Gwamnan Jihar Yobe, Dr. Mai Mala Buni, Ya Yi Godiya Ga Al’ummar Jihar Yobe, Ya Yi Kira Da A Ci Gaba Da Zaman Lafiya

Mai girma Gwamnan Jihar Yobe, Dr. Mai Mala Buni, ya bayyana godiya mai zurfi ga al’ummar jihar bisa goyon baya da ƙauna da suka nuna masa tun daga lokacin da ya hau kujerar mulki.  

A cikin saƙonsa, Gwamnan ya ce:  

“Na ke turo muku wannan saƙo ne da zuciya cike da godiya mai zurfi. Tun daga ranar da na ɗauki nauyin jagorantar jiharmu a matsayin Gwamna, ban ga komai daga gare ku ba sai aminci, girmamawa da ƙauna ta gaskiya. Goɗiyarku ita ce tubalin nasarorin da muka cimma tare, kuma ina yaba muku yadda kuka rayu cikin amana da zaman lafiya.”  

Mai Mala Buni ya kuma yi nuni da cewa yayin da ake kusantar shekarar 2027, ana ci gaba da tattaunawa kan wanda zai gaje shi a matsayin Gwamna. Sai dai ya jaddada cewa wannan lamari na nan a hannun Allah, domin Shi ne ke ba da mulki ga wanda Ya so a lokacin da Ya zaɓa.  

Ya ce:  

“Kowa ya ɗauki darasi daga labarina. Mulki da iko na Allah ne kaɗai. Shi ne yake ba da jagoranci ga wanda Ya so, a lokacin da Ya zaɓa. Ni kaina shaida ne ga wannan, domin na zama Gwamna ne da nufin Allah, ba tare da tsammanina ba.”  

Gwamnan ya yi kira ga al’ummar jihar da su ci gaba da kasancewa ɗaya, tare da mai da hankali kan ci gaban Yobe, ba tare da siyasar gaba ta raba su ba.  

A ƙarshe, ya sake gode wa jama’a bisa amincewa, addu’o’i da sadaukarwa wajen bunƙasar jihar, tare da roƙon Allah ya ci gaba da albarkace su. Wannan yana cikin wata sanarwa ce da ya wallafa a shafinsa na Facebook a daren jiya Laraba.